每年四、五月期間，由天王壓陣的大型廣告紛紛出籠，今年也不例外，郭富城有百事可樂，劉德華繼續夥拍愛立信，蘇永康第二輯電訊廣告亦殺到埋身，而黎明除五月接拍新一輯和記廣告外，上月尾更往巴黎拍了一輯法國無限美洗頭水廣告，實行先「髮」制人。 　　今次廣告的總投資額達二千五百萬元，而黎明的片酬更高達一千三百萬元，若果一個人真係有三千煩惱絲話，黎明每一條頭髮逐條計大約值四千幾蚊，真係唔講得笑。

劇情走《甜蜜蜜》feel

　　究竟個廣告講乜呢？原來又係夠晒商業元素愛情故事，走番《甜蜜蜜》浪漫溫馨feel，劇情講Leon同個女仔由邂逅到分手再而重逢，溫馨場面自然係個女仔同Leon談情，又貪玩咁用洗頭水泡沫整落Leon個頭度，然後劇情仲使講？梗係戲肉啦，Leon會洗濕個頭，然後好型咁fing兩fing，等Fans對個熒幕尖叫之後，咪影番支洗頭水ending囉。

　　今次廣告的製作班底來頭不小，製作總監洪永德曾參與很多大型廣告製作，代表作有劉德華和關之琳的愛立信手提電話廣告，以及張曼玉的櫻雪沐浴露廣告。 　　導演梁振文則經常執導個人護理產品廣告，作品有王祖賢及關之琳的P&G護膚品廣告，美術指導則由曾任周慧敏形象設計的余家安負責。

天寒地凍用凍水洗頭

　　今次廣告取景地點全部集中在巴黎，除了基本的旅遊區如鐵塔、香榭麗舍大道、教堂外，主要室內場景選擇了一間位於市郊的百年古堡。古堡佔地約十萬呎，有百多年歷史，內有萬呎花園、天鵝湖等設施，每日租金約三萬元法郎。 　　

　　拍攝當日，巴黎的氣溫約2℃，黎明拍攝洗頭鏡頭自然要有熱水供應，但由於古堡已有百年歷史，熱水要用超過八十呎長的水喉從街外接駁入古堡。但當拍至第五個鏡頭後，熱水供應竟告暫停，未能再泵到熱水入堡，幾經搶修也無計可施，加上拍攝檔期緊迫，穿上單薄白恤衫的黎明，惟有用凍水繼續洗頭，並要好瀟灑好型fing頭作其享受狀，滋味絕不好受。

　　拍攝途中，古堡的女屋主看見自己大宅大廳地上滿佈洗頭水泡沫，原本欲投訴兼終止拍攝，但當見到黎明咁凍天時仲用凍水洗頭兼且作其享受狀，不禁化怒為笑喜劇收場。至於那一個洗頭鏡頭因屬全個廣告焦點，大家只能待廣告五月出街後才可在熒幕一睹黎明洗濕個頭look。